Սույն մեթոդական ուղեցույցը (այսուհետ՝ Ուղեցույց) նախատեսված է Հայաստանի Հանրապետության համայնքների տեղական ինքնակառավարման մարմինների (այսուհետ՝ ՏԻՄ-եր), համայնքային հիմնարկների, համայնքային ենթակայությամբ առևտրային և ոչ առևտրային կազմակերպությունների (այսուհետ՝ համայնքային հիմնարկներ և կազմակերպություններ) արխիվային գործի վարման համար պատասխանատու պաշտոնատար անձանց, ինչպես նաև համայնքի կառավարման և զարգացման հարցերով զբաղվող մասնագետների համար և կարող է խթան հանդիսանալ համայնքների արխիվային գործի կազմակերպման և կայուն կառավարման գործընթացների ապահովման համար:
Ուղեցույցի հիմնական նպատակն է Հայաստանի Հանրապետության արխիվային հավաքածուի համայնքային սեփականություն հանդիսացող փաստաթղթերի կառավարման (համալրման, հաշվառման, պահպանության, օգտագործման) հետ կապված իրավահարաբերությունները սահմանող Հայաստանի Հանրապետության օրենսդրության և տեղական ինքնակառավարման բնագավառի օրենսդրության գործող կարգավորումների համատեքստում ներկայացնել համայնքների ՏԻՄ-երի կողմից համայնքային սեփականություն համարվող արխիվային փաստաթղթերի կառավարման գործընթացները կազմակերպելու և իրականացնելու իրավական քայլերն ու գործողությունները։
Ուղեցույցը նպատակ ունի նաև համայնքի արխիվային գործի վարման մասին գիտելիքների ընդլայնման և հաղորդման միջոցով նպաստելու և զարգացնելու ՀՀ համայնքների արխիվային գործի վարման պատասխանատուների գիտելիքներն ու կարողությունները՝ համայնքային սեփականություն համարվող արխիվային փաստաթղթերի կառավարման վերաբերյալ։